Image


સંજોગ

" સંજોગ " શબ્દને વ્યાકરણની દ્રષ્ટિ એ જોવા જઈએ તો, સંયોગ, ભેટો, દૈવયોગ, પરિસ્થિતિ વગેરે અર્થ થાય છે. પણ દરેકની વચ્ચે એક પાતળી ભેદ રેખા છે, જે તરત પરખાઈ જાય છે. સાહેબ, આ જ છે આપણી માતૃભાષાની ગૌરવતા અને એનું સુસમૃદ્ધ શબ્દ ભંડોળ.

સંયોગ એટલે ભેગું થવું. પછી બે રસાયણ હોય કે પતિ- પત્નિ  વગેરે કંઈ પણ.
પરિસ્થિતિ એટલે બાહ્ય, ભૌગોલિક પરિસ્થિતિ.
દૈવ યોગ એટલે પૂરે પૂરું પ્રારબ્ધ.
સંજોગ એ આ બધાનો શિરોમણિ છે. આ સંયોગ, દૈવ યોગ, પરિસ્થિતિ બધું થોડે વધતે અંશે ભેગું થાય ને ત્યારે બને સંજોગ.

સંગ હોય સ્વજન....,
તો સંજોગ બને રંજન....

ખૂબ પૈસા હોય ને સંતતિ જ ન હોય કે નબળી હોય તો ?  અને બધું જ હોય પણ મુદ્દો સંપત્તિ જ પાતળી હોય તો? પરિવારમા થી એકાદનું મન તો ખાટું રહેવાનું જ .

એક ભાઈનું બહુ મોટું નામ, ધન, યશ, બંગલા- ગાડી બધું જ હતું. બે દિવસ દિકરો - વારસ પણ આવ્યો. " હાશ. " ને અચાનક ભૂકંપ આવ્યો. બધું સફાચટ. ને સંજોગો એવા આવી પડ્યા કે, પેલા સાત ખોટના દિકરાને દૂધના પણ ફાંફા થઈ ગયા.

" સંજોગો હોતા નથી, પેદા કરવા પડે છે. "  આ છે સફળતા ને વરી ચૂકેલા માણસનું વાક્ય. એનું પ્રારબ્ધ તો જોર કરતું જ હતું, એમાં એનો પુરુષાર્થ ભળ્યો, પરિવારના સદસ્ય પણ મહેનતી અને સંતોષી હતા. તો આ બધું ભેગું થયું, ને તે ભાઈ સફળતાના શિખરને આંબી ગયા. એક એક પગથિયું રચતું ગયું, ચારે બાજુ થી સંજોગો ને પૂરે પૂરી પૃષ્ટતા મળી હતી. આ ભેગા થયેલા સંજોગો જ્યારે છૂટા પડવા લાગે ને ત્યારે સડસડાટ નીચે પણ આવી જવાય છે. એક ગઝલકારે લખ્યું છે,
"  સંજોગ જુકાવે છે, નહીતર
અહીં કોણ ખુદાને પૂછે છે. "

સહુ એ એક વાત તો મગજ મા બરોબર ઠસાવી દેવી કે,
‘ સંજોગો’ સાથે ‘સમય ‘ નથી બદલાતો પરંતુ,
‘ સમય ‘ સાથે ‘ સંજોગો ‘ અવશ્ય બદલાય છે.

" સંજોગ " આ ત્રણ અક્ષરનો શબ્દ આપણી જીંદગીમાં બહુ મોટો ભાગ ભજવે છે. ભાગ્યે જ મળતા ત્રણ દોસ્ત જો ભેગા થઈ જાય ને, ત્યારે જીંદગીનો અલગ જ અનુભવ થાય છે. એ છે-

સમય + સંજોગ + સંબધ .


Thanks,
Alpa Vasa